Mabahoe man nga selebrasyon sa nasyon it Kuwait ro Eid’l Fitr bilang sangka Muslim country.
Ginaumpisahan it mga raya ro andang adlaw sa paglimpyo sa andang eawas, pagsuksok it mga manami nga eambong ag pagkaon it pilang bilog nga datiles antes pa man mag-adto sa masjid para umpisahan ro adlaw it pagpangamuyo.
Suno kay Bombo International Correspondent Dennis Rata, ro mga lumang kagamitan hay ginabayluhan it bag-o kon sa siin ro mga mayad nga amo hay ginapana-o nanda raya sa andang mga kabulig.
Naging tradisyon man sigon it mga raya nga magpana-o it mga regalo ukon hadiya bilang simbolo sa pagselebrar it Eid.
Ginpahayag dugang ni Rata nga kalipay para kanda nga makata-o it regalo eabi eon sa andang mga abyan ag himata.
Espesyal para kanda raya nga adlaw kon sa siin makit-an ro maabong handa ag sambilog eon kara ro pagkatay it tupa para himuon nga putahe nga may saeohan ro bilog nga pamilya.
Maskin siin nga parte it nasyon hay ginaselebrar it mga Muslim ro Eid’l Fitr ag sambilog eon kara ro Pilipinas nga gindeklarang holiday makaron nga adlaw it Biyernes.
