Kapareho sa pagkinasadya it mga tawo sa United Kingdom hay ro malapiyesta man nga kasadyahan sa New Zeland kasunod it makasaysayan nga koronasyon ni King Charles III.
Raya hay bilang ro New Zeland hay sambilog sa miyembro it commonwealth nation.
Ginpahayag ni Bombo International Correspondent Reynand Dumalaon it New Zealand nga “party mode” eon ro nagapangunang karsadahon ag bilog nga New Zeland.
May mga libreng concert ag ice cream sigon ro ginapatigayon sa nasambit nga nasyon ag makabig nga family day ro mismong adlaw it koronasyon ni King Charles.
Magapatigayon man it 21-gun salute ro New Zealand Army’s 16th Field Regiment sa Point Jerningham sa Wellington makaron nga adlaw it Dominggo, bandang alas-12 it udtro adlaw.
Sa idaeom it naval tradition, ro Royal New Zealand Navy hay magapartisipar man sa igapatigayon nga gun salute.
Suno kana nga haeos tanan sa New Zeland hay masadya sa pagkorona sa bag-ong hari it Britanya.
Nagaeaum sanda nga magalig-on pagid ro relasyon it New Zeland ag United Kingdom sa idaeom it pagdumaea ni King Charles III.
Suportado it mga Kiwis ro igapatigayon nga liderato it bag-ong hari kun siin maskin ro prime minister ag Gobernador General hay nagtambong sa Westmister Abbey para personal nga saksihan ro koronasyon ni King Charles.
Sa pihak nga parte , sandig man sa mga survey nga ginpatigayon sa New Zeland , kaeabanan sa mga Kiwis nagahambae nga imposible nga maging republican government ro nasyon bangud eamang sa pag-angkon it bag-ong monarkiya.
Nasayuran nga ro New Zeland hay nagapabilin nga constitutional monarchy sa mahaba eon nga panyempo rason nga masyadong mabahoe nga pagbag-o kung gulpiyada rayang igahalin sa republican government.
