Nagpadumdom ro Bureau of Fisheries and Aquatic Resources (BFAR) sa mga mangingisda nga preparahan ro hana nga pagtama it El Niño phenomenon sa nasyon.
Posible sigon nga maka-epekto sa suplay it mga isda ro grabe nga kainit it panyempo.
Apang suno kay Rosalia Tampos, Presidente it Kalibo fish vendor association nga owa man sanda it nakikita nga direktang epekto kara sa suplay it isda.
Batyag eamang sigon nanda ro paghina it daeakpan it isda kung may kalamidad ukon mahayag ro buean.
Bastante suno kana ro suplay it mga isda sa merkado publiko sa banwa it Kalibo rason nga owa dapat it kabaeak-an ro mga manugbakae.
Ginapahayag nga kaabuan sa andang mga baligya nga isda hay maghalin sa probinsya it Antique, Iloilo ag Roxas.
Angot kara, nagapabilin man ro mga isda sa andang tagsa ka mga dating presyohanan.
May pagtaas eamang sigon sa mga presyo it isda kung may kakueangan raya sa suplay ag kung mahina ro daeakpan.
