Ginpaathag it sangka batikang abogado sa Aklan ro mga rason kon ham-an nga nabasura ro sambilog pa sa daywang nabilin nga drug-related cases ni dating Senador Leila de Lima.
Suno kay Atty. John Mar Barrios nga naging mahina ro ginatawag nga proof beyond reasonable doubt ukon mga mabaskog nga ebidensiya kasunod it pag-bawi it statement it mga nagapangunang testigo.
Naging kuwestiyunabli suno kana ro kredibilidad it mga testigo rason nga nabasura ro kaso.
Bangud kara, nabasag sigon ro chain of custody nga required sa idaeum it RA 9165 ukon comprehensive dangerous drugs act of 2002.
Ginpahayag dugang ni Atty. Barrios nga raya ro kaeabanan nga problema sa drugs cases rason nga nadi-dismiss ro mga kaso.
Sa pihak nga parte, nagapati si Atty. Barrios nga may merito ro kaso bangud nga nag-agi raya sa tamang proseso ag ginbaton man it mga korte, apang ro naging problema eamang nga umatras ro mga testigo nga nakaangkon it mabahoe nga epekto sa kaso.
Madumduman nga ginbawi it key witness nga si dating Bureau of Corrections (BuCor) Deputy Director Rafael Ragos ro testimonya kara ko nagtaliwan nga dag-on, rason nga nakaangkon it pagduda kun guilty baea ro dating senadora.
Nauna eon nga ginapaninggitan ni de Lima nga biktima imaw it war on drugs it dating administrasyong Duterte .
