Uman nga naangkon it Gilas Pilipinas ro korona bilang hari it Southeast Asian basketball.
Raya hay matapos nga napyerde nanda ro Cambodia sa score nga 80-69 ag nakuhit ro bueawan nga medalya sa 32nd Southeast Asian Games sa atubang it maabong tumaean-aw sa Morodok Techo Elephant Hall 2 sa Phnom Penh.
Uwa nagpatinag ro Gilas sa host nation nga maabong naturalized players rason nga napasaalima it mga raya ro bueawan nga medalya nga nakadugang sa listahan it Pilipinas.
Samtang, eubus man ro kalipay ni Gilas Pilipinas coach Chot Reyes bangud nga nagresulta it manami ro ginpangabudlayan it koponan.
Sa nasambit nga hampang, nag-iskor si Justin Brownlee it 23 points, seven rebounds ag four assists.
Samtang, nag-amot man si Chris Newsome it 16 points ag 10 points mat-a ro nadugang ni Marcio Lassiter.
Madumduman nga nauna eon nga ginpyerde it Cambodia ro Gilas sa una nandang pagsambuwa sa score nga 79-68.
Apang, uwa eon raya nasundan pa ag nabuoe it mga Pinoy ro kadaeag-an.
