Ginkalipay it pamilya Burnasal ro nakataeana nga pag-istudyo it National Commission of Senior Citizens (NCSC) sa mga requirements para sa Guinness World Record para sa pinakamagueang nga tawo nga nagakabuhi sa ibabaw it kalibutan matapos nga mavalidate sa Philippine Statistics Authority (PSA) ro “late registration” record it sangka 123-anyos nga lola nga si Radigondes Burnasal it Barangay Tigayon, Kalibo.
Suno sa anang onga nga si Milagros Burnasal, eubus ro andang kalipay nga nakaabot sa makaruyon nga edad ro andang ina.
Malisod eon kana ro paghambae apang nakakabati gihapon, nakakaaninag it tawo ag imaw mismo ro nagapakaon sa anang kaugalingon.
Ginpaathag ni Milagros nga katong tyempo hay kamoteng kahoy ag mga tinuean-on eamang ro andang ginakaon bangud nga nag-istar sanda sa bukid sa probinsya it Capiz hasta nga napadpad sa banwa it Kalibo.
Gin-onga si lola ko Mayo 9, 1900 sa Brgy. Janlud, Libacao kon sa siin nakapangasawa it taga-Roxas ag nakaonga it siyam nga bilog.
Nakabaton eon man imaw it centenarian award ko 2017 maghalin sa Department of Social Welfare and Development ukon DSWD ag mga cash gift maghalin sa lokal nga gobyerno it Kalibo.
Una kara, mismong sanday NCSC Commissioner Ricardo Rainer Cruz III ag Commissioner Reymar Mansilungan hay nakipagbahin sa 123rd birthday celebration ni Bursanal nga ginpatigayon ko Mayo 13 kon sa siin gintaw-an nanda ro magueang it P10,000 pesos nga cash gift bilang regalo.
Nasayuran nga ro Guinness record holder para sa oldest living person in the world hay ginabuytan it 115 year old American-Spanish nga si Maria Branyas Morera nga ginkumpirma it Guinness ko Enero it presenteng dag-on kasunod it pagkamatay it French nun nga si Lucile Random it France sa edad nga 118 anyos.
