Nakaangkon it emergency meeting ro Provincial Disaster Risk Reduction Management Council kaibahan ro nagkaeain-eain nga ahensya it gobyerno agud nga istoryahan ro preparasyon ag mga dapat nga himuon antes pa man tumama ro hana nga pagtuhaw it El Niño.
Suno kay Manuel Jayfree Jizmundo it Aklan PDRRMC nga ro emergency meeting hay kasunod sa pagpaguwa it abiso it NDRRMC nga posibleng tumama ro El Niño sa western side it nasyon.
Angot kara, ginpasiguro sigon it Provincial Social Welfare Development Office ukon PSWDO nga may bastante nga goods nga igapanupod sa mga posibleng maapektuhan nga pamilya.
Mag-eowas kara, magapanupod man sigon ro Department of Agriculture it mga binhi nga angay nga itanom sa tag-init.
Ginpahayag dugang ni Jizmundo nga makaangkon pa sanda it uman it meeting para mabatian ro preparasyon it iba pang ahensya para maging haom ro tanan sa bilog nga probinsya it Aklan.
