Sangka Nigerian chef ro uwa it untat nga nag-eaha sa sueod it 100 hours ukon ap-at nga adlaw para sa handom nga Guinness World Record!
Naging sueod it balita sa Nigeria ro chef nga si Hilda Effiong Bassey ukon mas kilaea bilang Hilda Baci bangud sa anang 4-day non-stop cooking marathon.
Sa record breaking attempt nana raya agud nga makuhit ro Guinness World Record title nga “Longest Cooking Marathon (Individual)”.
Ro presenteng nagapanag-iya it titueo hay si Lata Tondon it India, nga may nailistang 87 hours and 45 minutes nga uwa it untat sa pag-eaha.
Natabo ro record breaking attempt sa Lekki commercial hub sa Lagos, Nigeria ko nagtaliwan nga Mayo 11.
Base sa sueondanan nga ginpaguwa it Guinness, pwede eamang magpahuway si Hilda it 1 hour sa kada 12 hours it pag-eaha.
Naabot ni Hilda ro ika-100 hours ko 7:45 p.m. it Mayo 15.
Sa nasambit nga marathon, nakaeaha it 55 traditional Nigerian delicacies si Hilda kon sa siin tuyo nana nga promote ro mga pagkaong Nigerian.
Ro 100 hours nga pag-eaha ni Hilda hay naka-livestream sa nagkaeain-eain nga online platform rason nga gintutukan it Nigerians sa bilog nga kalibutan.
Sa makaron, ginarebisa pa it Records Management Team it Guinness ro mga ginpasang record attempt evidence antes nanda ikumpirma ag taw-an it official certification si Hilda Baci.
