Ginpakigbahin ni Carla Suner Dorormal ro executive assistant I to the Office of the Municipal Mayor ku LGU Kalibo nga maabo ro mga aktibidades nga ginpahaom it banwa para sa mga devotees, bisita, turista ag lokal sa nag-umpisa eun nga Kalibo Sto. Nino Ati-atihan Festival 2024.
May mga bisita ag mga events sa maabo nga lugar sa banwa ro pagahiwaton nga ro talent fees sigon hay ginbilog halin sa Kalibo Ati-atihan Festival Board ag sa mismong buesa ni mayor.
Makaron sigon maga-umpisa nga maging masako ro bilog nga banwa bangud sa mga nakalinyada nga mga events.
Ginpatpat man ni Doromal ro mga aktibidad para sa grand festival week nga maga-umpisa eun hinaga kapareho it expo, food festival, misa, processions, sadsad ag sinaot sa kalye.
Tanan sigon raya hay gintinguhaan gid nga pahauman it LGU Kalibo.
Ro mga ruta man hay nakapost sa mga official facebook pages nanda, may mga igasarado man nga mga daean ag may pagataw-an man it car pass pero magtao sigon sa gihapon it konsiderasyon sa parade.
Puno eun man ro mga slots para sa mga bazaar ag mga puwesto para sa food festival.
Samtang ginkoronahan si Gwency Go bilang Binibini ng Kalibo Ati-atihan Festival 2024 it Numancia, kung siin nga may mga nakataeana nga premyo.
Depende man sigon sa kandidata kung igarepresentar nana ro banwa sa national stage pero ginpasalig nana nga una ro Local Government Unit it Kalibo para suportahan imaw.
Samtang ro mga judges nga ginpili sigon nana hay ro mga Akeanons nga madinaeag-on sa andang mga career ag field of works.
Saligan sigon nga maging “mas pinalaki, mas pinasigla ag mas pinasaya”, raya nga selebrasyon.
