KALIBO, Aklan – Maduea-an it suplay it tubi ro mga customer it Metro Kalibo Water District nga magabuhay it kapin sa ap-at nga oras sa sueod it sang adlaw sa Sabado, Mayo 25.
Suno kay Frederick Buenavidez, tagapaghambae it MKWD nga base sa andang ginpaguwa nga advisory, maga-umpisa ro water interruption bandang ala-1 it hapon hasta alas-5 it hapon kun sa siin ro maapektuhan kara hay ro mga concessionaires halin Crossing Buswang hasta sa barangay New Buswang multi purpose hall kaibahan ro Pabelico Road.
Ginpahayag ni Buenavidez nga ro pagkaduea it suplay it tubig sa nasambit nga mga lugar hay bangud sa pagahimuon nga interconnection it bag-ong butang nga distribution line sa Sitio Alimatok, Barangay New Buswang, Kalibo agud nga eubus pa nga mapamayad ro water service sa nasambit nga lugar.
Sa oras nga matapos eagi ro trabaho hay posibleng maibalik man eagi ro water supply.
Ginpahayag dugang nga ro aktibidad hay kaparte it upgrading projects it ahensiya.
Samtang, ginpahayag pa ni Buenavidez nga nasolusyunan eon ro andang problema sa pagnaba it andang water supply sa andang mga wheels sa bulig it provincial government pinaagi sa pagpahueam it andang heavy equipment ag mga operator kara para sa pagpatigayon it rechanneling sa tubi it Aklan River.
Nasayuran nga tuga it epekto it El Nino umpisa ko buean it marso hay nataeupangdan ro pagnaba it andang water supply it hasta sa 1,000 cubic meter kada adlaw.
