BANGA, Aklan—Nagapati si punong barangay Sofronio Boniog it Polo, Banga nga posibleng naka-agto sa kantilado nga portion it suba ro naeumos nga 15-anyos nga biktima.
Suno kana nga ulihi eon nga napan-uhan it mga residente ro natabu matapos nga makabati it pag-einahay it mga ayam ag nagpanic eon ro anang mga kaibahan.
Nagbulig man suno kana ro mga pumueuyu nga mag-rescue apang ulihi eon ro tanan rason nga ginhueat eon lang nanda ro pag-abot it search and rescue team it MDRRMO-Banga.
Posible suno kana nga inanud ro biktima sa “linaw” kun sa siin haeos 15 feet ro kadaeum it tubi.
Gin describe ni kapitan boniog nga sa idaeum it linaw hay may dalipi nga may madaeum nga matsa kutkot rason nga engkaso nga idtu haagto ro biktima hay nagakinahangean it mga divers agud nga mausoy ag mabo-oe ro anang eawas .
