KALIBO, Aklan — Nag-umpisa eon nga magpanaba it presyo ro mga retailer it bugas sa banwa it Kalibo matapos ro ginpatuman nga Food Security Emergency sa bugas it Department of Agriculture.
Suno kay Alfred Jimenez, sangka rice retailer sa Kalibo Public Market/relocation site nga ro pinaka-manaba nanda nga presyo it bugas makaron hay P40 kada kilo ag ro pinakamahae hay P60 kada kilo.
Mag-eowas kara, mabahoe nga bagay man sigon ro tiempo it anihan rason nga nakaangkon it bastante nga supply it bugas eabi eon sa probinsiya it Aklan.
Nagahampang ro presyo it local rice sa 1,000 hasta 1,100 kada sako nga may 25 kilos ro timbang samtang ro mga imported rice hay naga-average sa P1,330 hasta P1,500 kada sako nga may 25 kilos man ro timbang.
Madumduman nga nauna eon nga nagdeklara it food security emergency si Agriculture Secretary Francisco Tiu-Laurel Jr. agud nga masolusyonan ro padayun nga pagtaas it presyo it bugas sa mga merkado.
