KALIBO, Aklan—Kasunod it nag-viral nga video it mga pamatan-on nga naeakot sa ginasugid nga hazing, nagpaadam si Atty. Janmar Barrios it Barrios Law Firm nga may saeabton sa laye ro sin-o man nga involved kara bangud sa mas ginpabaskog nga anti hazing act of 2018.
Suno kana nga maskin nga mga menor de edad ro eakot sa nasambit nga video hay may saeabton gihapon sanda sa laye nga pwede nanda nga pagaserbihan sa oras nga maka-abot sanda sa legal nga edad engkaso nga mapamatud-an nga nagkasaea .
Hazing ro kaeabanan sigon nga initiation rite it mga fraternity ukon gang sa mga neophyte ukon mga bagitong gustong maging miyembro it grupo ukon organisasyon.
Dikara sigon gina testingan kon hasta siin nimo masarangan nga ipakigsukoe ro inyong kapatiran.
Ginpahayag ni Atty. Barrios nga sa idaeum it laye, bawae ro hazing bilang initiation rite sa anumang grupo.
Raya hay bangud sa posibleng bukon it manami nga consequence nga igatuga kara .
Dugang pa nga dapat nga naka rehistro man ro mga organisasyon sa mga eskwelahan .
Kinahangean suno kana nga ipahisayod sa pamunuan it eskwelahan antes nga magpatigayon it hazing ukon iba pang initiation rites.
Engkaso nga makatuga it sakit ukon kahalitan , indi maganaba sa 6 hasta 8 dag-on nga pagkakulong ro igapapanaog nga sentensiya sa mga may saea .
Hasta nagakabuhi man nga pagkakulong ro penalidad kon magaresulta sa kamatayon ukon rape ro hazing.
Mapinahan man sigon ro sin-o man nga una sa lugar nga gin eontaran it hazing .
Buot hambaeon nga bukon it absuwelto ro mga saksi maskin nga bukon it sanda ro mismo nga may kahimuan it pagpanakit nga tuga it hazing.
Ginrekomenda man nana nga makaangkon it orientation angot sa peligro it hazing ro mga eskwelahan ag sa mga ginikanan hay giyahan ag bantayan it husto ro mga inunga agud nga indi magtaeang it daean nga paga agihan .
