Nagpatigayon it pagtililipon ro mga OFW supporters ni dating pangueong Rodrigo Duterte sa Piazza Cairoli sa Milan Italy ku Dominggo, Marso 16.
Suno kay Armie Delos Santos, Bombo International Correspondent sa Milan Italy, eubos nandang ginkasubo ro pagka-aresto kay dating pangueong Rodrigo Duterte ag nabatyagan nandang madja nadueaan sanda it tatay bangud si Duterte eamang sigon ro nag-isog it buot nga solusyunan ro pageapta it droga sa nasyon. Kaya, nagpatigayon sanda it rally nga may mga daeang banners ag pati eon man watawat it Pilipinas, naghiwat man sanda it prayer meeting sa lugar para kay dating pangueong Duterte.
Naga-abot sa kapin 1000 ro mga nagtambong nga mga OFW maghalin sa makaeain-eain nga lugar sa Italy para makipagbahin sa nasambit nga pagtililipon.
Dugang pa ni Delos Santos nga sa makaron hay plano nandang mag-adto sa The Hague, Netherlands para ipakita ro andang suporta ag makipagbahin man sa iba pang mga pro-duterte.
Magapatigayon it pagtililipon sa sangka stadium para mag meet and greet sigon kay VP Sara Duterte ag iselebrar ro nagahilapit nga kaadlawan ni dating pangueong Rodrigo Duterte.
Paathag man ni Delos Santos sa tanan nga supporters nga padayunon eang ro pagsuporta ag indi mag pundo hasta indi mauli si FPRRD sa Pilipinas.
