KALIBO, Aklan — Nagapadayun pa ro imbestigasyon it Bureau of Fire Protection (BFP)-New Washington sa nagtuhaw nga sunog, hapon it Huwebes, Marso 20, sa maritime training center it Aklan Polytechnic College sa Brgy. Tambak sa nasambit nga banwa.
Suno kay FO2 Jonathan Señel, arson investigator it BFP New Washington nga maskin nga may pagduda nga faultry electrical wiring ro rason it sunog, apang ginatumod pa nanda kon ano ro rason it pagtuhaw it kaeayo.
Ro danyos hay ginaboeobanta nga naga abot sa P4,536,000.
Nag-umpisa ro sunog pasado ala-1 it hapon. Nag-abot raya sa ikaywang alarma antes nga gindeklarang fire out alas-2:45 it hapon.
Naugdaw ro ap-at nga grado nga building nga nag-umpisa sa 4th floor.
Ginpahayag dugang nga pag-abot sa fire scene hay mabahoe eon ro kaeayo ag naging mabudlay para kanda nga maka-penetrate bangud nga ro saeog hay himo sa kahoy ag medyu gabok eon.
Nasayuran nga umpisa 2018 hay owa eon masyadong ginagamit ro building kun sa siin owa eon raya it mga importanteng gamit sa sueod kundi mga libro ag iba pang mga papeles.
Rumesponde sa insidente ro mga fire truck it Kalibo, Banga ag Numancia kamana man ro mga tawuhan it PDRRMO ag MDRRMO-Kalibo.
Sangka bumbero ro naninahan sa insidente nga insigida man nga gintaw-an it paunang medikasyon.
Nasayuran nga ro building hay may disenyong barko nga dating nagaserbing maritime training center it nasambit nga eskwelahan.
