KALIBO, Aklan — Wasak ro prente it sangka wing van truck matapos nga sunggaban ro sangka poste sa crossing diversion road sa Barangay Tondog, Tangalan, pasado alas-11:30 it gabi-i it Huwebes, Marso 20.
Nakaeowas sa aksidente ro driver it trak kaibahan ro anang pahinante.
Suno sa Tangalan Municipal Police Station nga halin sa siyudad it Iloilo ro wing van ag magapaliko eon kunta sa diversion road paagto sa destinasyon kara sa Brgy. Caticlan, Malay kat bumunggo sa sangka poste it telco samtang nagapaliko.
Ro wing van hay may karga nga mga pakwan nga inug-deliver.
Sa pihak nga parte, bandang alas-6:00 it agahon it Biyernes, aksidente man nga sumunggab ro sangka closed van sa likod it nadisgrasya nga wing van nga magapaliko man kunta sa nasambit nga karsada ag paagto man sa direksyon it Caticlan, Malay.
Nagkalhit ro mga karga nga canned goods it closed van tuga kabaskog it pagbunggo, kun sa siin haeos natunga ag sumueod ro unahan nga parte it saeakyan sa likod it wing van.
Bangud sa insidente naninahan ro driver kara ag gindaea sa ospital it mga rumespondeng tawuhan it MDRRMO Tangalan.
Kapareho sa alegasyon it driver it wing van, owa man sigon kumagat ro preno it closed van rason nga owa nakontrol ro manibela.
Padayun pa nga gina imbestigahan it kapulisan ro insidente.
