NATIONAL News — Ginpadumdum it Movie and Television Review and Classification Board (MTRCB) ro mga transportation company ag operator nga ro mga paguwa eamang nga may content nga rated ‘G’ ukon General Patronage ag ‘PG’ ukon Parental Guidance ro ginapasugtan eamang nga ipaguwa sa sueod it public utility vehicles (PUV).
Sa sangka pahayag, ginpabutyag it MTRCB nga ro nasambit nga polisiya hay ginamandu sa idaeum it Memorandum Circular No. 03-2024 nga nagatumod sa ‘common carriers’ bilang ‘movie theaters’ para sa regulatory purposes.
“This ensures that content remains appropriate and has no negative impact on minors traveling with their families,” pahayag it MTRCB.
Nagpanawagan man ro ahensiya sa mga pasahero nga insigida nga i-report ro mga pag-eabag pinaagi sa MTRCB official social media channels @MTRCBGov ukon via e-mail ag complaints@mtrcb.gov.ph.
Samtang, ro pagpaguwa it padumdum it board hay bangud sa pag-ueulian it mga biyahero sa andang natungdan nga mga probinsiya para dumdumon ro Holy Week ukon Semana Santa, kun sa siin ro mga Filipino hay may madaeaum nga debosyon pinaagi sa pagserbisyo sa simbahan, prusisyon ag personal nga pag-obra it penitensiya.
