Madinaeag-on nga naangkon it sangka fresh graduate ro anang handum nga lisensya sa pagiging Engineer.

Suno kay Engr. Carla Maquirang, tumandok it Maloco, Ibajay ag board examination passer it Electronic Engineering, naging hangkat kana ro pagsueod sa sangka unibersidad sa kasagsagan it pandemya bangud online ro pag-tuon ag uwa imaw haeos it komunikasyon sa anang mga kaklase para mapangayuan it assistance kun kinahangean.

Bangud sigon karon, may sambato imaw nga subject nga napaseawang ipasa kaya gin-retake nana ag madinaeag-on man nana nga naeagas ag nakagraduate imaw sa oras.

Dugang pa ni Carla nga mabahoe nga bulig ro pag-pili it tama nga mga abyan samtang naga-eskwela bangud raya ro makabulig para maeampasan ro mga malisod nga hangkat sa pag-tuon.

Pahayag nana nga samtang uwa pa natapos ro andang klase hay nag-umpisa eon eagi sanda mag review online apang nag pundo it daywang buean ag bumalik eon lang sa pag-review it face-to-face.

Samtang naga-board exam suno kana hay gin-practice man nana ro mga pamahiin nga masami nga ginapatihan it mga nagabuoe man it licensure exam ag mageuwas sigon karon hay nagtu-on gid imaw ag nagpangamuyo sa Ginuo.

Paathag dugang ni Carla nga sa makaron hay mapaguway anay imaw ag bawi-on eon lang anay ro mga tueog ag kun may manami nga oportunidad hay batunon.

Padumdom man nana sa mga estudyante nga padayunon ro pag practice ag pag-eskwela bangud ro pag-tuon hay continuing process ag uwa natatapos. Magpahuway man sigon kun nagaoy bangud indi man maproseso it utak ro natun-an kun nagaoy.