Nagabuylog ro Diocese of Kalibo sa pagpangasubo it bilog nga simbahang katolika sa pagkamatay ni Pope Francis. Raya ro ginpahayag ni Fr. Justy More, chancellor it Diocesan Curia it Diocese of Kalibo. Apang bangud sa pagpati it mga Katoliko sa resurrection ukon uman nga pagkabuhi, sangka nagapangunang doktrina it Kristiyanismo hay nagakalipay man sigon sanda bangud nga nagwakas eon ro anang mga pag-antus halin sa anang gina-angkon nga baeatian.
Dugang pa nga nagtaliwan ro santo papa sa easter octave ukon waeong adlaw nga selebrasyon nga naga-umpisa sa Domingo it Pagkabanhaw ag nagatapos sa Second Sunday of Easter nga mas kilaea man sa tawag nga Divine Mercy Sunday.
Angot kara, samtang ginalamayan ro Santo Papa idtu sa St. Peter’s Basilica hay gina engganyo nanda ro mga simbahan nga magpangadi it novena ag mga misa. Ko Lunes nga adlaw hay insigida sigon nga nagpatigayon it misa sa St. John The Baptist Church matapos nga masayuran ro pagtaliwan ni Pope Francis. Andang ginahaead ro kada misa ag pangamuyo para sa namatay nga Santo Papa. Suno kana nga naduea-an ro simbahan it Holy Father ag matuod nga makatawo nga gintau ro anang kaugalingon agud nga maghatud it pag-eaum.
Sa pihak nga parte, plano ni Fr. More nga magbiyahe paagto sa Roma agud nga magtambong sa funeral ni Pope Francis.
