MALAY, Aklan—Pitong grupo halin sa nagkaeain-eain nga barangay it Malay ro magapasakop sa Fiesta de Obreros dance competition makaron nga dag-on.
Suno kay Kathrine Licerio, tagapaghambae it Malay Tourism Office nga ro nasambit nga kompetisyon hay kaparte it ginbansagan nga “grandest festival” sa Aklan angot sa sang domingo nga selebrasyon it kapistahan sa pagtau it pasidungog sa patron it banwa it Malay nga si Saint Joseph the Worker.
Igapakita sa festival dance contest nga pagahiwaton sa Mayo 1 ro klase it trabaho sa kada barangay nga nagapasakop kamana man ro andang kasaysayan, kultura, ag tradisyon sa andang performances.
Ro sin-o man nga magadaog hay magabaton it trophy ag cash prize.
Mag-eowas sa dance competition, maabu nga iba pang aktibidad ro nakalinyada nga ginpahaum it lokal nga gobyerno , kun sa siin, may mga dinapit nga bisita nga magatau it kalingawan sa mga tumaean-aw .
Samtang, gindesisyunan sigon it LGU-Malay nga duea-on makaron nga dag-on ro street dancing .
Ro Fiesta de Obreros sa mainland malay hay sambilog sa mga tourist attraction it banwa mag-eowas sa isla it Boracay.
