Nagtapos eon ro public viewing para sa haya ni Pope Francis kahapon, oras sa Pilipinas.
Suno kay Rev. Fr. Justy More, chancellor it Diocesan Curia it Diocese of Kalibo, nga padayon sa gihapon nga nag-abo ro tawo para sa ulihing public viewing sa haya it Santo Papa.
Si Fr. More hay personal nga nagtambong sa Vatican para masaksihan ro pagdaea it eawas it santo papa sa anang ulihing kahimtangan.
Dugang pa nana nga pag-abot nana sa Vatican, insigida imaw nga nakipagbahin sa Vigil nga gin hiwat sa St. Mary Major kun sa siin iga-eubong ro eawas it santo papa. Nataw’an man sigon sanda, kaibahan ro iba pang mga Pilipinong pari, it oportunidad nga makita ro haya ni Pope Francis sa eayo nga 2-3 metro.
Pahayag dugang ni Fr. More nga heavily guarded ro public viewing apang uwa man it anumang komusyon nga nagtuhaw bangud mahim’ong ag naga-sunod man sa sueundanan ro mga pamueuyo.
Ro eubong it santo papa hay pagahiwaton makaron nga adlaw it Sabado, Abril 26 sa Basilica Sta. Maria Maggorie, ag ro eubong hay bukas para sa tanan.
