KALIBO, Aklan—Nagapadayon ro maeapnagong pagpanupod it Commission on Elections (Comelec) it Voter’s Information Sheets (VIS) bilang pagpahaom sa eleksyon sa Mayo 12.
Suno kay Atty. Christian Itulid, election officer IV it Comelec Kalibo, doble kayod makaron ro komisyon nga maipanupod tanan ro VIS bangud nga gintaw-an eamang sanda it 20 diyas nga maipasaalima sa mga registered voters ro nasambit nga papel.
Ro VIS, nga may ap-at nga panig hay may nakabaehag nga importanteng impormasyon kaparehas it lokasyon it presinto, giya sa paggamit it vote-counting machines, ag listahan it mga kandidato.
Ginpahayag dugang ni Itulid nga pwedeng daehon it mga botante ro VIS sa adlaw it eleksyon bilang giya sa tamang pagboto.
Samtang, nagpaandam ro komisyon sa mga sample ballot nga pwedeng may nakabaehag nga saea nga impormasyon.
Nasayuran nga target makaron it Comelec nga maipanupod makaron ro VIS sa masobra 68 milyong rehistradong botante bago matapos ro Abril.
Kaibahan eon man sa distribusyon ro pag-verify it tamang address it mga botante.
