Ginabawaean eon makaron nga adlaw it dominggo, Mayo 11, ro tanan nga klase it pagpangampanya it tanan nga kandidato para sa nakataeanang eleksyon hin-aga nga adlaw it Lunes, Mayo 12.
Kadungan kara hay ro pagpatuman man it nationwide liquor ban.
Gin-engganyo ni Comelec Chairman George Erwin Garcia ro mga kandidato nga umpisahan eon ro pagkakas it mga campaign materials, kaibahan ro mga maeakuang tarpaulin bangud sa ginakabig eon raya nga pag-eabag sa mga patakaran it eleksyon.
Gin-insister pa ni Garcia nga bukon it sakop it exemption sa campaign ban ro mga digital platforms.
Samtang, ginpadumdom dugang it poll body nga sa mismong adlaw it eleksyon, likawan it mga kandidato nga maglibot matapos bumoto, bangud sa pwede raya kabigon bilang last-minute campaigning.
Magabukas ro polling precincts umpisa alas-5:00 it agahon agud taw-an it prayoridad ro mga magueang, mga tawong may kapansanan, ag mga nabdos nga rehistradong botante nga makaboto it agahon hasta alas-7:00 it agahon.
