Pagaumpisahan eon ro pagbaligya it P20 kada kilo it bugas sa kadiwa stores sa Metro Manila ag mga kaeapit nga probinsiya sa Mayo 13, sang adlaw pagkatapos it midterm elections.
Suno kay Department of Agriculture (DA) Secretary Francisco Tiu Laurel Jr., kaparehas it andang ginpromisa, igapadayon ro pagbaligya it baratong bugas pagkatapos it eleksyon.
Paathag it opisyal nga temporaryong ginpaiway ro pagbaligya it baratong bugas bilang sabat sa napueong adlaw nga spending ban halin ko Mayo 2.
Nauna eon nga ginlunsar ro nasambit nga programa sa Cebu City sa unang bahin it Mayo ag inisyal nga gintaeana ro an-om nga bueang pilot implementation sa Visayas.
Kaibahan sa mga pwedeng makabakae it baratong bugas hay ro vulnerable groups kaparehas it solo parents, persons with disabilities, senior citizens ag mga miyembro it 4Ps.
Ginaeauman nga magabenipisyo sa nasambit nga programa ro kapin sa 2 million households ukon 10 milyong Pilipino nga magabuhay hasta sa Disyembre nga tuyong makatao it masarangan ag manami nga klase it bugas sa mga kapin pang nagakinahang-ean.
