KALIBO, Aklan — Target it Western Visayas nga maabot ro ginahandum nga number 1 spot sa maabot nga Palarong Pambansa 2025 sa Laoag, Ilocos Norte sa Mayo 24 hasta Hunyo 2, 2025.
Suno kay Mr. Hernani Escullar Jr., spokesperson it Department of Education Region VI nga kahapon nga adlaw it Lunes, Mayo 19 hay nagbiyahe eon paagto sa Laoag ro kapin sa 999 nga delegado it Western Visayas nga ginaeakipan it 608 nga mga atleta, 152 ro coaches, assistant coaches ag chaperones kamana man ro 245 nga miyembro it nagkaeain-eain nga komitiba it rehiyon.
Nasayuran nga ko 2024 Palarong Pambansa nga ginpatigayon sa Cebu City hay nagnaba sa ikatlong pwesto ro Western Visayas halin sa second place finish ko 2023.
Magiging mabaskog sigon nanda nga kaengkwentru ro National Capital Region (NCR) nga naangkon ro andang ika-17 nga kampeonato sa Palarong Pambansa ko nagtaliwan nga dag-on.
Dugang pa ni Escullar nga magiging unique man ro partisipasyon makaron it Western Visayas bangud nga daywang regional directors ro magadumaea sa delegasyon it rehiyon.
Raya hay ginaeakipan nanday DepEd Region VI OIC Director Dr. Cristito A. Eco, ag si Negros Island Region Director Dr. Ramir Uytico nga dating naghalin man sa Region VI.
Ginpaathag nana nga sa ulihing kahigayunan hay maga-iba pa ro delegasyon it Negros Occidental sa Western Visayas bangud nga kan-o eamang natukod ro DepEd NIR kun sa siin makabig raya nga makasaysayan.
