NEW WASHINGTON, Aklan — Owa ginaeauman ni Mrs. Josephine Algarne, adoptive mother it tricycle driver nga si Wilson Mariano nga sa gulpiyada hay maduea ro anang unga nga ginakabig nana nga mabuot ag masaligan.
Suno kana nga hasta sa makaron hay indi pa nanda mabaton ro natabu sa anang unga nga anang ginpabahoe umpisa kat 15 anyos raya.
Si Wilson sigon hay unga it anang amiga ag kat nagmasakit hay sanda ro nag-alaga ag ko ulihi hay nagsunod raya sa andang pag-uli sa Aklan.
Nasayuran nga kaibahan sa tatlo nga mga napuruhan sa pag-arado it fuel tanker sa tricycle hay ro 23 anyos nga driver.
Matapos sigon nga gin-inform sanda sa natabu nga aksidente hay naabutan pa nanda nga duguan ro anang unga nga ginatatap it mga katapo it MDRRMO agud nga madaea sa ospital.
Naka-istorya pa sigon nana raya samtang gina-transport sa sangka private hospital, apang makataliwan ro haeos sang oras hay namatay samtang ginabueong bangud sa grabeng lastro sa anang ueo.
Naisipan eamang it anang unga nga magbiyahe ko Lunes ag nagpromisa kana nga maga-uli eagi agud nga makapanindahan sanda.
Nakataeana nga maga-abot hin-aga nga adlaw it Miyerkules sa Aklan ro mga matuod nga ginikanan ni Wilson halin sa Tarlac.
Sa makaron hay tatlo ro namatay sa insidente, apang daywa pa sa ap-at nga confine sa Aklan Provincial Hospital ro una sa kritikal nga kondisyon.
Hinyu nana nga makaangkon it hustisya ro kamatayon it anang unga.
Haum sigon sanda nga mapasakaan it nagakaigo nga kaso ro driver it fuel tanker nga ginasugid nga nakatueugan samtang nagamaneho .
Igahaya ro anang unga sa andang baeay sa sangka unit it pabahay sa Brgy. Ochando, New Washington.
Samtang, eubus man nga nagapangasubo ro Aklan State University sa pagkamatay it sambilog sa andang faculty member nga si Dr. Beonify dela Cruz-Opinion, 58, ag residente it Batan kamana man ro 50-anyos nga eaeaki nga residente it Brgy. Dumaguit, New Washington nga puro magapasueod eon kunta sa andang natungdan nga mga trabaho.
Samtang, kasong Reckless Imprudence Resulting to Multiple Homicide, Serious Physical Injuries, ag Damage to Property ro igapasaka sa driver it fuel tanker nga si Ramil Fernandez, 37-anyos ag residente it Minglanilla, Cebu.
Nauna eon nga gin aku it driver nga nakatueugan imaw ag masyadong madasig ro mga natabu.
Laygay ni Mrs. Algarne sa mga driver nga kon owa sa kondisyon ro eawas eabi eon kon gaoy ukon ginaduyog hay indi pagpiliton nga magmaneho agud nga makalikaw sa distrasya.
