KALIBO, Aklan — Ginatugyan eon it barangay council sa pamilya it biktima ro pagdesisyon kon igapursige ro pagpasaka it kaso kontra sa andang tanod nga nagbuno-patay sa 50 anyos nga si Adelaydo Isuga alyas Laydo sa guwa it baylihan ko aga-aga it Sabado, Mayo 17, sa Brgy. Manhanip, Malinao kadungan it andang kapistahan.
Raya ro ginpahayag ni Punong Barangay Jenetta dela Cruz.
Suno kana nga matapos nga ginkasa it pamunuan it Malinao Municipal Police Station ro manhunt operation hay nagtawag ro suspek nga si Rolly Imperial, 42, ag residente it nasambit nga lugar sa kapulisan ag nagpahayag nga boluntaryo nga magasurender.
Ginbo-oe sigon raya it Malinao MPS sa baeay it anang magueang ag ginderetso sa detention facility it nasambit nga police station.
Samtang, ginkumpirma ni Kapitan dela Cruz nga dating away ro nagtueod sa suspek nga bun-on it makapilang beses ro biktima nga gintunaan it anang hinali nga kamatayon.
Ginsaysay it opisyal nga ko nagtaliwan nga buean it Marso hay ginbaril it biktima ro andang tanod kat magkita sa sangka namatyan sa nasambit man nga lugar, apang maswerteng naka-eumpat ag nakadaeagan.
Posible suno kana nga kat makita nana raya sa guwa it baylihan hay naisipan nana nga magbaeos .
Samtang, ginpahayag ni Kap dela Cruz nga sa sueod it tatlong dag-on nga pagserbisyo ni Imperial bilang tanod hay owa man sanda it naging problema kara.
Madumduman nga dead-on-arrival sa provincial hospital tuga it pilang igo it pagbuno ro biktima nga tumandok it Cabayugan, Malinao.
