KALIBO, Aklan — Nagpangayo it pasaylo National Grid Corporation of the Philippines (NGCP) Visayas bangud sa maekperyensiyahan nga haeos 12 oras nga brownout hin-aga nga adlaw it Sabado, Hunyo 14.
Suno kay Reagahn Alcantara, tagapaghambae it NGCP Visayas nga magapatigayon sanda it preventive maintenance work.
May naka-schedule sigon sanda nga shutdown it 69-kilovolt Nabas-Sapi-an Line agud nga taw-an it daean ro andang transmission line correction.
Ginpahayag pa ni Alcantara nga maapektuhan kara ro ap-at nga sub-stations it Aklan Electric Cooperative (Akelco) nga ginaeakipan it Altavas, Andagao, Lezo ag Ibajay kun sa siin maduea ro supply it kuryente umpisa alas-6 it agahon hasta alas-6 it gabi-i.
Paga-ayuson sigon kara ro transformer it Nabas substation kamana man ro linya it Nabas-Sapi-an 69KV transmission line.
Sa 17 nga banwa sa Aklan, ro banwa eamang it Malay ag Buruanga ro bukon it apektado kamana man ro portion it Nabas nga ginaeakipan it mga barangay it Libertad, Tagaroroc, Unidos, Rizal, Pawa ag Union.
Sa pihak nga parte, maduea-an man it power supply ro mga banwa it Pandan ag Libertad sa Antique.
