Inihayag ng Mababang Kapulungan ng Kongreso na 90 hanggang 95 porsyento na ang kahandaan para sa ika-apat na State of the Nation Address (SONA) ni Pangulong Ferdinand R. Marcos Jr. na nakatakdang ganapin sa Hulyo 28 sa Batasang Pambansa, Quezon City.
Matapos ang final interagency coordination meeting, iniulat na nasa huling yugto na ng preparasyon ang Kamara, kabilang na ang pagbuo ng mga contingency plan sakaling maapektuhan ng masamang panahon. Tiniyak din na walang naitalang pagkaantala sa mga aktibidad sa kabila ng mga pag-ulan.
Tapos na rin ang mga paghahanda para sa seguridad, na katulad ng sa mga nakaraang taon, habang nananatiling alerto ang mga kinauukulang ahensya kahit walang natukoy na partikular na banta.
Inaasahan ang katulad na bilang ng mga dadalo gaya ng nakaraang taon, kung saan mahigit 1,500 katao ang lumahok. Hinihikayat naman ng Kamara ang publiko na subaybayan ang SONA sa pamamagitan ng iba’t ibang media platform upang malaman ang ulat ng Pangulo sa kalagayan ng bansa at mga plano para sa hinaharap.
