Ibinasura ng Korte Suprema ang kasong impeachment laban kay Pangalawang Pangulo Sara Duterte dahil sa paglabag sa isang-taong pagbabawal na itinakda ng 1987 Konstitusyon sa pagsasampa ng higit sa isang reklamo laban sa parehong opisyal.
Sa nagkakaisang desisyon ng en banc ng Korte Suprema na inanunsyo noong Hulyo 26, 2025, idineklarang labag sa Konstitusyon ang mga artikulo ng impeachment laban kay Duterte. Dahil dito, hindi maaaring hawakan ng Senado ang kaso.
Binigyang-diin ng Korte Suprema na hindi pa lusot si Duterte sa mga paratang, ngunit maaari lamang magsampa ng panibagong reklamo simula Pebrero 6, 2026.
Ang desisyon ay nakabatay sa Article XI, Section 3, Paragraph 5 ng Saligang Batas na nagsasaad na hindi maaaring magsagawa ng higit sa isang impeachment proceeding laban sa isang opisyal sa loob ng isang taon.
Naitala na apat na impeachment complaints ang inihain laban kay Duterte mula Disyembre 2024 hanggang Pebrero 2025. Ang una ay isinampa noong Disyembre 2, 2024 na may 24 artikulo ng paratang gaya ng katiwalian, panunuhol, paglabag sa tiwala ng publiko, at iba pang mabibigat na krimen. Sinundan ito ng dalawang reklamo noong Disyembre 4 at 19, at ang ikaapat ay isinampa noong Pebrero 5, 2025 ng 215 kongresista.
