Nilinaw ni Pangulong Ferdinand R. Marcos Jr. na ang desisyon ng Korte Suprema sa isinantabing impeachment complaint laban kay Pangalawang Pangulo Sara Duterte ay nakatuon lamang sa mga pagkukulang sa proseso at hindi sa nilalaman ng reklamo.
Sa isang press briefing sa India, sinabi ng Pangulo na hindi sinuri ng Korte Suprema ang merito ng kaso, kundi ang mga teknikal na isyung may kaugnayan sa kung paano ito hinawakan ng Kamara. Ayon sa Korte Suprema, lumabag sa “one-year bar rule” ang reklamo at hindi nabigyan ng due process ang inaakusahan, dahilan upang ibasura ang buong proseso.
Noong Miyerkules, inaprubahan ng Senado ang mosyon ni Senador Rodante Marcoleta na kilalanin ang desisyon ng Korte Suprema noong Hulyo 25, 2025, na nagresulta sa pormal na pagsasara ng impeachment case. Nabigo naman ang mosyon ni Senate Minority Leader Vicente Sotto III na ipagpaliban ang botohan, sa botong 19-5.
Binigyang-diin ni Pangulong Marcos na walang papel ang ehekutibo sa impeachment proceedings, at ito ay nasa saklaw lamang ng Kongreso at Korte Suprema.
