Eala kumita ng P8.7M sa unang panalo sa US Open

Tiniyak na ni Alex Eala ang P8.7 milyon matapos makapasok sa ikalawang round ng 2025 US Open, kasunod ng makasaysayang panalo laban sa World No. 14 Clara Tauson ng Denmark, 6-3, 2-6, 7-6 (13/11).

Nabawi ng 19-anyos na Filipina ang laban matapos maiwan sa 1-5 sa huling set at tuluyang nagwagi sa marathon match na tumagal ng mahigit dalawang oras.

Dahil dito, tiyak na si Eala ng $154,000 mula sa rekord na $90 milyong prize pool ng torneo.

May pagkakataon siyang madagdagan pa ang premyo—$237,000 (P13.4M) kung makalusot sa susunod na round.

Muli siyang sasabak sa Miyerkules kontra sa magwawagi sa pagitan nina Cristina Bucsa at Claire Liu.