Inihayag ng Malacañang na maghahain ang Department of Justice (DOJ) ng kahilingan sa International Criminal Police Organization (Interpol) para sa paglalabas ng blue notice laban kay Ako Bicol party-list Rep. Zaldy Co, na lumabas ng bansa sa gitna ng imbestigasyon sa umano’y iregularidad sa mga proyektong flood control.
Si Co, dating pinuno ng House Committee on Appropriations, ay iniimbestigahan dahil sa umano’y pagtanggap ng kickback mula sa mga kuwestyunableng proyekto ng Department of Public Works and Highways (DPWH). Ayon sa DOJ, inilabas na ang Immigration Lookout Bulletin Order upang mamonitor ang kanyang galaw.
Layunin ng blue notice mula sa Interpol na matukoy ang kinaroroonan ni Co at subaybayan ang kanyang mga biyahe habang nagpapatuloy ang imbestigasyon.
Batay sa mga ulat, lumipad si Co patungong Estados Unidos noong nakaraang buwan para umano sa medikal na gamutan. Ayon sa tala, pumasok siya sa Singapore noong Setyembre 16 at lumipad papuntang Madrid, Spain noong Setyembre 24.
