Ipinahayag ng Palasyo ng Malacañang ang panghihinayang sa pagbibitiw ni Baguio City Mayor Benjamin Magalong bilang special adviser ng Independent Commission for Infrastructure (ICI), ngunit tiniyak na magpapatuloy ang imbestigasyon laban sa mga maanomalyang proyektong pang-imprastruktura.
Ayon kay Presidential Communications Office Secretary Dave Gomez, mas mahalaga ang tiwala ng publiko sa komisyon kaysa sa sinumang indibidwal at dapat hayaan ang ICI na gampanan ang mandato nito nang walang panghihimasok sa pulitika.
Ipinaliwanag ni Magalong na nagbitiw siya hindi upang iwan ang laban kontra korapsyon kundi upang protektahan ang integridad ng ICI, matapos lumitaw ang mga pagdududa sa kalayaan nito.
Ang ICI ay nilikha sa bisa ng Executive Order No. 94 noong Setyembre 11 upang siyasatin ang mga iregularidad sa multi-bilyong pisong flood control at iba pang proyekto sa nakalipas na sampung taon.
