KALIBO, Aklan — Hugut eon nga igapatuman it Land Transportation Office (LTO) Region 6 ro No Plate, No Travel Policy sa Western Visayas umpisa sa Oktubre 15, 2025.
Angot kara, nag-isyu it memorandum si LTO 6 Regional Director Atty. Gaudioso Geduspan II nga nagamandu sa mga district office, law enforcers, kamana man sa mga deputized personnel nga ipatuman raya bilang pag-comply sa Sec 18, it RA 4136 ukon Land Transportation and Traffic Code.
Nakabaehag sa nasambit nga memorandum nga pagapasugtan eamang ro improvised plate kon ro LTO office nga nagproseso it duplicate plate request hay nag-isyu it written authorization.
Samtang, ro mga otorisado nga improvised plates hay dapat nga nagapakita it assigned plate number ag may nakasueat nga “Improvized Plate” kun sa siin, ro anuman nga improvised ukon temporary plate nga gingamit nga owa it nagakaigo nga dokumento hay pagadakpon.
Nasayuran nga kapin sa P5,000 ro penalty kon mapaseawan nga magtakod it license plate ag raya hay pagakumpiskahon.
Nag-abiso man si Dir. Geduspan sa mga motorista nga boe-on eon ro andang natungdan nga plaka antes pa man ro nakataeana nga deadline ukon makipag angot sa pinakamaeapit nga district office para sa duplicate-plate processing agud malikawan ro multa.
