KALIBO, Aklan — Nasaksihan ni Atty. Jose Rowell Imperial, municipal election officer it banwa it Malay ro pagkarambola it siyam nga mga saeakyan sa national highway nga sakop it Sitio Tolingon, Brgy. Libertad, Nabas, pasado alas-6:20 it gabi-i it Lunes, Oktubre 20.
Suno kana nga samtang nagapauli sa banwa it Malay halin sa Iloilo kaibahan ro anang unga hay nakita nanda sa andang likod ro 10-wheeler wing van truck ag iba pang saeakyan nga nag-eueupad nga matsa sangka eksena sa peliikula.
Sa mayad nga swerte suno kana ag medyu may distansiya sanda sa truck rason nga owa nadaeahig sa aksidente ag owa man natamaan it mga debris.
Sa pihak nga parte, ginaeauman nana nga makabulig sa imbestigasyon it kapulisan ro video nga naga-circulate makaron sa social media nga bo-oe it dash cam halin sa anang saeakyan.
Ulihi eon sigon imaw nakabatyag it koeba kat gin-review ro anang dash cam samtang naga-ihapon sa Brgy. Union, Nabas, kun sa siin nakita nana ro impact it aksidente.
Apela nana sa mga motorista eabi eon sa mga umaeagi nga truck driver nga bukon it kabisado ro lugar nga likawan nga mag-overtake partikular sa mga patakason ag paubuson nga karsada agud nga makalikaw sa aksidente.
