KALIBO, Aklan — Mabahoe ro pagpasaeamat it mga kaibahan sa vulnerable sector nga nagbaton it ginpanupod nga bugas nga nagabalor eamang it P20 kada kilo sa idaeum it programang “Benteng Bigas, Meron Na!”, nga opisyal nga ginlunsar sa probinsiya it Aklan adlaw it Martes, Nobyembre 11 it makaron nga dag-on.
Suno kay Rosalyn Odinada, 4Ps beneficiary ag residente it Brgy. Estancia, Kalibo nga gindayaw nana ro nasambit nga programa kamana man ro kalidad it bugas nga iya mismo gin-ani sa probinsiya.
Kabay suno kana nga maga-dere-deretso ro pagbaligya kara bangud sa malisod nga pagpangabuhi ag limitado eamang ro andang budget.
Bangud nga barato ro presyo it bugas hay nakabakae imaw it gintaeana nga 10 kilo kada benepisyaryo .
Nagpasaeamat man imaw kay Pangueong Marcos Jr., nga nataw-an it katumanan ro anang ginpromisa nga baratong bugas.
Nauna eon nga ginpahayag it provincial agriculture office nga tuyo it programa nga maserbusyuhan anay ro mga sektor nga eubus nga nagakinahangean kapareho it mga senior citizen, PWDs, solo parents, ag 4Ps beneficiaries.
Naga-abot sa 800 nga sako it bugas ro andang ginpahaum para sa launching it programa.
Kinahangean eamang nga magdaea it ID bilang pamatuod ro mga gustong magbakae.
Ginpromisa man it provincial government nga magataeana it alokasyon agud nga madaea ro programa sa 17 nga banwa sa Aklan.
