KALIBO, Aklan—Uman nga ginpamatud-an it Bombo Radyo Philippines ro uwa katuead kara nga dedikasyon sa pagpanerbisyo sa banwa sa pinaagi it sambilog eon man nga makasaysayan ag nagasalbar it kabuhi nga Dugong Bombo nationwide blood-letting campaign.
Uwa pa it ibang organisasyon sa nasyon ro nakalista it mas malig-on nga rekord sa pag-organisa it pinakamabahoe ag pinakamaeapad nga single-day blood donation drive kundi ro Bombo Radyo Philippines.
Ro programang Dugong Bombo hay ginpatigayon it dueoeongan sa 25 nga nagapangunang lugar sa bilog nga nasyon ko Nobyembre 15, 2025, nga ginsuportahan it 32 fully digitalized Bombo Radyo ag Star FM stations it network.
Para sa Bombo Radyo Kalibo madinaeag-on nga nakatipon ro kampanya makaron nga dag-on it 136 blood bags ukon katumbasa it 61,200 cc ukon 61.2 liters ukon 16.16 gallons it dugo nga nagtao sa mga partner nga bloodbank it pinakaimportanteng suplay it eowas ag naga-eowas it kabuhi nga dugo.
Sa pakikipagbueoligan it Bombo Radyo Philippines Foundation, Inc., ag sa kooperasyon it Philippine Red Cross ag Department of Health nationwide, nakatipon ro Dugong Bombo it kabilugang 4,657 bags, katumbas it 2,095,650 cc, ukon 2,096 litro, ukon 554 gallons, ukon 10 drums it nailistang donasyong dugo halin sa 4,657 nga boluntaryo ag madinaeag-on nga donors.
Dugong Bombo: A Little Pain, A Life to Gain.
Ro dag-unan nga flagship project ngara hay nagapabilin nga promisa it Bombo Radyo Philippines agud magbulig nga makasalba it kabuhi eabi eon sa mga una sa peligro daea it malala nga baeatian, mga medikal nga emerhensiya, ag mga sakuna nga nagakinahang-ean it insigidang blood transfusion.
Tanan nga madinaeag-on nga donors hay nagbaton it limited-edition it Dugong Bombo T-shirt, mainit nga pagkaonn, meryenda, ag mga bitamina bilang pasaeamat sa andang marangal nga kontribusyon.
Sa ngaean it Bombo Radyo Philippines, ginapaabot namon ro amon nga hantop sa tagipusuon nga pagpasaeamat sa tanan nga blood donors, madinaeag-on man ukon bukon, maging sa amon nga mga partners, sponsors, ag tagasuporta.
Ro inyong pag-ulikid, kamayad ag uwa it sawang suporta ro padayon nga nagaeowas ag nagabag-o it maabo nga kabuhi.
Hasta sa masunod nga Dugong Bombo: A Little Pain, A Life to Gain.
Ililiba kita nga naga-eowas it kabuhi!
