KALIBO, Aklan — Kumpiyansa si Sangguniang Bayan member Engr. Emerson Lachica nga masarangan nga matapos ro construction it New Kalibo Public Market sa Pebrero 28, 2026.
Raya hay matapos nga mabatian ro eksplinasyon it pamunuan it Rotaflex Construction and Development Corporation nga nagtambong eon sa ginpatawag nga hearing it Committee on Infrastructure ko nagtaliwan nga Nobyembre 26 it makaron nga dag-on.
Apang ginsuhestiyon ni Engr. Lachica bilang chairman it nasambit nga komitiba nga dugangan ro mga tawuhan sa kada scoop of work agud nga mapadasig pa ro trabaho ag maka-eagas sa andang ginpangayo nga extension it date of completion.
Samtang, ginpahayag it contractor nga na-delay sigon ro andang trabaho bangud sa pabag-o bag-o nga tiempo ag mga naeksperyensiyahan nga power interruption kamana man ro isyu ag proseso sa relocation it mga vendors.
Sa pihak nga parte, ginkumpirma man it structural engineer nga si Angelo Tanbua nga ro gina-construct nga building hay may kabahueon eamang nga 2,680 square meter halin sa masobra sa 6,000 square meters nga area it tindahan bangud nga raya eamang sigon ro nasarangan it gin-alokar nga pondo nga P300-milyon.
Ro bakante nga espasyo sa palibot hay pagagamiton nga parking space.
