KALIBO, Aklan — Naka-aresto ro Police Regional Office 6 it 25 nga mga suspek ag naka-rekober it 26 nga armas sa mas ginhugtan nga kampanya kontra sa loose firearms umpisa Nobyembre 1 hasta 29 sa bilog nga Western Visayas.
Suno kay P/Major Lailyn Sencil, public information officer it PRO-6 nga sakop it operasyon ro 24 nga law enforcement activities sa idaeum it Tokhang Kontra Armas Luthang, ro flagship initiative it regional office kontra sa illegal nga mga armas.
Tuyo sigon it ginhugtan nga kampanya nga mapanaba ro mga krimen ag kinagamo gamit ro mga owa it lisensiya nga mga baril .
Mag-eowas kara, nag-abot man sa 102 nga mga firearms ro boluntaryo nga gin-surender sa mga awtoridad.
Ginpahayag ni Major Sencil nga ro voluntary turnover hay nagapakita eamang it nagataas nga kooperasyon sa tunga it publiko ag law enforcement.
Sa pihak nga parte, hugut ro paandam it PRO-6 kontra sa indiscriminate firing sa nagahilapit nga holiday season eabi eon ro mga uniformed personnel.
Gindugang ni Sencil nga mas pa nga pagapabaskugon it kapulisan ro andang information dissemination programs agud nga ma-edukar ro publiko sa posibleng madangatan engkaso nga magpatigayon it iresponsabling pagpaeupok it baril kamana man ro andang pag monitor agud nga mapenahan ro mga maga-eabag kara eabi eon sa pagsug-aeaw sa Bag-ong Dag-on.
Sa makaron hay indi eon man sigon magapatigayon it nozzle taping ro PNP.
