MALINAO, Aklan — Emosyunal nga nagpaathag si Punong Barangay Rosario dela Cruz it Bulabud, Malinao kun ham-an nga naitsapwera ro sambilog sa 14 nana nga aktibong barangay tanod sa ginpanupod nga Christmas ayuda nga gina-alehgar nga naghalin sa taeatapan ni Aklan 2nd District Conggressman Florencio “Lolo Cong” Miraflores.
Ginklaru nana nga owa naeakip sa listahan ro tanod nga si Michael Ibardolasa bangud sa kontra partido raya ko nagtaliwan nga eleksyon.
Ro ayuda suno kana nga P3,000 nga cash hay gin-distribute sa barangay poblacion Malinao ko nagtaliwan nga adlaw.
Posible suno kana nga ro ginbasehan it mga benepisyaryo hay ro lumang listahan nga ginsumite nanda dati.
Kabaliskaran sa mga nagtuhaw nga balita, cash eamang ro ginpanupod ag owa it gift pack.
Dugang pa nga bangud sa natabu hay gindesisyunan nana nga mag-solicit it tig-P200 sa iba pang mga tanod nga nakabaton it ayuda agud nga mataw-an man imaw it hueay, kun sa siin plano nana nga igatau kunta ro matipon nga kwarta sa andang session ko adlaw it Domingo.
Apang bangud sa kahuy-anan nga naagum it andang barangay council online pinaagi sa bashing it mga netizens hay posibleng indi eon raya matabu ag posibleng kakason lang imaw bilang tanod .
Nasayuran nga sa interview kay Ibardolasa, ginpaabot nana ro anang kaeain it buot matapos nga solohanon eamang nga imaw ro owa nakabaton it nasambit nga ayuda.
Dati sigon nanda nga kaalyado si Ibardolasa apang nagseparar raya ko nagtaliwan nga eleksyon ag naging lider it pihak nga partido.
Gintinguhaan man it Bombo Radyo Kalibo nga mabo-oe ro parte ni Ibardolasa apang may importante raya nga paeanawon.
