KALIBO, Aklan — Ginbulabog man it bomb threat ro Aklan State University rason nga nagkansela it klase sa tanan nga mga campuses sa bilog nga Aklan, agahon it Huwebes, Disyembre 18.
Base sa report it Kalibo Municipal Police Station, bandang alas-9:30 it agahon kat ginasugid nga nakabaton it bomb threat ro pamunuan it ASU-Kalibo campus.
Apang bangud nga owa naka-specify kon siin nga campus gintanum ro gina-alegar nga mga bomba, ginpakamayad nga kanselahon it administrasyon it tanan nga mga campuses it ASU ro trabaho ag pisikal nga klase it andang mga estudyante nga magabuhay hasta sa adlaw it Biyernes, Disyembre 19 para sa kaeowasan it andang mga professor ag estudyante kamana man it mga faculty staff.
Ginpahayag dugang nga tanan nga transaksyon sa nasambit nga unibersidad hay suspindido man.
Nagresponde sa lugar ro mga personnel it Kalibo MPS, Municipal Disaster Risk Reduction and Management Office, Special Weapons and Tactics (SWAT) team ag Explosive Ordinance Disposal (EOD) it Aklan Police Provincial Office bitbit ro andang K-9 dogs para usuyon ro gina-alegar nga bomba.
Bangud sa insidente, mas pa nga ginpabaskog ro seguridad bukon eamang sa ASU Kalibo kundi sa iba pang campuses it nasambit nga unibersidad sa bilog nga Aklan kapareho it Banga, Ibajay ag New Washington.
Ginasugid nga gin-eubong ro gina-alegar nga pito tanan nga mga bomba sa eugta.
Ro mensahe hay ginpadaea sa sangka manugturo it ASU Kalibo pinaagi sa Facebook messenger halin sa sangka dummy account it nagahingaean kay Lailai Koi.
Insigida raya nga ginreport kay Dr. Jeffrey Clarin, president it ASU nga nagtawag man sa kapulisan.
Sa interview it Bombo Radyo, ginpahayag ni Dr. Clarin nga natalakay eon nanda sa andang meeting ro nagakatabu nga serye it bomb threat sa mga State Universities and Colleges (SUCs) sa bilog nga nasyon rason nga nasayuran eon nanda ro mga dapat nga obrahon.
Sanda sigon ro pinaka-ulihi nga SUC nga nakabaton it pagpamaeag it bomba.
Maskin nga nag-negatibo sigon ro mga nauna nga bomb threat sa ibang mga SUCs, apang indi nanda raya mabalewala.
Nagahimo eon sigon it nagakaigo nga tikang ro Commission on Higher Education (CHED), DICT ag iba pang natungdan nga ahensiya it gobyerno agud nga matutukan ro mga paeag sa seguridad it mga SUCs eabi eon kon raya hay halin sa online platforms.
Sa makaron hay nagapadayun pa ro imbestigasyon it mga awtoridad agud nga matumod ro identity ukon pagkatawo it nagpadaea it bomb threat .
