Ginaselebrar it Bombo Radyo Philippines ro an-om nga dekada it media excellence sa pinaagi it Top Level Management Conference umpisa Enero 5 hasta it 11, 2026, nga may temang “Bombo Radyo Philippines: Celebrating 60 Years of Media Excellence.”
Ginapangunahan nanday Chairman Dr. Rogelio M. Florete kamana man President ag Chief Executive Officer Margaret Ruth C. Florete ro aktibidad, kon sa siin magatambong sa kumperensiya ro mga station managers ag senior officers halin sa 25 key areas it Bombo Radyo Philippines network sa Iloilo City.
Ro sang dominggong pagtipon-tipon hay nakatutok sa strategic planning ag direction-setting bilang pagpahaom it network sa mga masunod pang dag-on.
Pagatalakayon kara ro mga isyu it inobasyon, pampublikong serbisyo, ag padayon nga promisa sa kredible, responsable, ag public service-oriented broadcasting.
Bilang kaparte it ika-60 anyos nga anibersaryo, tampok it Bombo Radyo Philippines ro mahabang listahan it mga prestihiyosong pasidungog sa patag it news reporting, public affairs programming, ag public service broadcasting.
Kaibahan kara ro Bombo Network News, nga back-to-back winner it Catholic Mass Media Awards (CMMA) bilang Best News Program para sa 2024 ag 2025, ag ro Star FM, nga ginkilaea bilang Best Entertainment Program sa sueod it tatlong sunod nga dag-on halin 2023 hasta it 2025.
Samtang, ro Bombo Radyo Iloilo, flagship station it network, hay ginkilaea bilang Best AM Station (Provincial) ag Best News Program (Provincial) sa 28th Golden Dove Awards 2025 it Kapisanan ng mga Brodkaster sa Pilipinas (KBP).
Masobra pa sa mga pasidungog, ginpalig-on it mga independent survey ro kredibilidad ag kumpyansa it publiko sa Bombo Radyo.
Nagguwa raya bilang Most Trusted News and Information Source sa Radio category sa National Survey on Media and Information Literacy it Philippine Information Agency ko Nobyembre 2024.
Ginkilaea man it OCTA Research ko Disyembre 2024 bilang nagapangunang radio source it balita ag impormasyon sa mga Pilipinong adulto, ag padayon nga nagapanguna sa quarterly Pahayag Survey it Publicus Asia, Inc. sa kategoryang Most Trusted Media Outlets in the Radio.
Ro tanan nga nasambit nga pagkilaea hay pamatuod it dedikasyon it Bombo Radyo Philippines sa pagpabilin it pinakamataas nga basehan it broadcast journalism.
Ginapalig-on man it kumperensiya ro pamana it Bombo Radyo bilang nagapangunang radio network sa nasyon, nga may 32 nga digitalized AM ag FM stations sa bilog nga Pilipinas, ag nagaserbing hantop sa tagipusuon nga pagpasaeamat sa publiko.
Bangud kinyo, ro Bombo Radyo hay padayon nga ginatib-ong ro kamayad sa pamamahayag ag paghatod it balita ag public service nga indi matupungan nga pag-obliga.
Basta Radyo, BOMBO!
