KALIBO, Aklan — Gin-umpisahan eon ro mga aktibidad it St. John The Baptist Parish Cathedral para sa Kalibo Señor Sto. Niño Ati-Atihan Festival ag Kapistahan it Señor Sto. Niño de Kalibo.
Suno kay Rev. Fr. Justy More, chancellor it Diocese of Kalibo nga bandang alas-5 it hapon it Huwebes, Enero 8 hay ginpatigayon ro opening ag send-off mass para sa mga law enforcement agencies ag volunteers nga magabantay sa peace and order ag seguridad it sang domingo nga selebrasyon.
Paga-umpisahan man adlaw it Biyernes ro 9-days nga devotional novena prayers and masses nga pagasundan it procession sa palibot it Pastrana park.
Ro dawn penitential procession it mga karo ag deboto hay pagapatigayunon sa January 17, sa bisperas it kapistahan ni Sr. Sto. Niño de Kalibo.
Sa pihak nga parte, kadungan it gina-abangan nga Kalibo Sadsad Ati-Atihan contest sa Jan 17, pagahiwaton man ro Hornada, pagbendisyon sa mga tribu ag pilgrims kamana man ro blessing of children.
Sa January 18, sa kaadlawan it kapiestahan ni Sr. Sto. Niño de Kalibo hay pagahiwaton ro pilgrims mass, grand procession ag closing liturgical rites, kun sa siin raya man ro pagtapos it sang domingo nga selebrasyon.
Sa pihak nga parte, ginpahayag ni Fr. More nga nag-umpisa eon man ro traditional nga Paea-pak sa Kalibo Cathedral nga magabuhay hasta sa Enero 18.
Nagbutang sigon sanda it barikada agud nga maging maayos ro daeagan it mga tawo nga gustong maka-eksperyensiya it paeapak.
Ro pagpaeapak hay sangka practice nga naghalin sa mga Akeanon. Raya hay sangka ritual kun sa siin ro imahe it santo Nino hay ginaharuan it mga deboto ag ginpahid sa bilog nga eawas sa pagpati nga makabueong sa mga sakit nga nababatyagan.
Samtang, apela ni Fr. More nga magsunod sa gintaeana nga protocols ukon patakaran agud nga malikawan ro gulo.
