KALIBO, Aklan — Nagaplano nga magapatigayon it victory party ro Tribu Linabuanon matapos nga madinaeag-on nga nadepensahan ro andang championship title sa Kalibo Sadsad Ati-Atihan Contest sa Tribal Big Category.
Bilang grand winner makaron nga dag-on, ginpiyerde it grupo ro an-um nga iba pang competing tribes sa Tribal Big Category ag uman nga nag-uli it P1.1 milyon nga cash prize.
Ro nasambit nga kategorya ro major contest sa gina-abangang Kalibo Sr. Sto. Niño Ati-Atihan Festival, ag may pinakamabahoe nga gintaeana nga cash prize.
Suno kay Rendel Bonifacio Ortega, lider it grupo, eubus ro andang kalipay ag pagpasaeamat matapos nga mapabilin ro kampeonato makaron nga dag-on.
Dugang pa nga sulit ro andang sakripisyo ag gaoy sa haeos pitong buean nga pagpahaum sa pag-obra it costume ag praktis sa pagpatik it tamboe antes ro competition proper.
Nagapati sigon imaw nga may laban gid man sanda apang owa masyadong nagsalig bangud nga puro mga manami ag preparado man ro iba pang mga participants.
Para kana ro andang kadaeag-an hay bunga it andang debosyon ag panata kay Sr. Sto. Niño.
Samtang, plano sigon it andang presidente nga magpatigayon it victory party ag iga-share ro pila sa andang nadag-an sa andang mga miyembro.
Ginpasiguro man nana nga mas pa nga pagapanami-on ro design it costume para sa uman nga pagsabak sa kompetisyon sa 2027.
Nasayuran nga raya pa eamang ro ika-ap-at nga dag-on nga pagpasakop it grupo sa Ati-Atihan contest.
Rendel Bonifacio Ortega, lider it Tribu Linabuanon
Sa pihak nga parte, mag-eowas sa championship title ag grand prize, nagdaog man ro Tribu Linabuanon it limang special awards nga Best in Costume, Best in Beats and Sounds, Best in Street Dancing, ag Best in Headdress nga may tig-P5,000 nga premyo ro kada sambilog .
Ro iba pang mga nagdaog sa Tribal Big Category hay ro Black Beauty Boys bilang first runner-up nga may P400,000 nga premyo; second placer ro Vikings ag ginsundan it Tribu Alibangbang nga naangkon ro Most disciplined award.
Sa Tribal Small Category, nagapanguna ro Tribu Tampogaling nga nagdaog man it tatlong special awards.
Sumunod ro Tribu Kabog ag Tribu Bukid Niñolitos sa ikatlong pwesto.
May kabilugan nga 31 nga tribu ag grupo ro nagparehistro ag nagpasakop sa Kalibo Sadsad Ati-Atihan Contest makaron nga dag-on.
