Ginsuhestyon ni Leodegario “Ka Leody” De Guzman, National President ng Partido Lakas ng Masa (PLM) nga dapat maid-id nga imbestigahan ro combat operation it Philppine Army kontra sa New Peoples Army sa Abra de Ilog, Occidental Mindoro bangud sa mga ginapahayag nga nakaangkon it pag-eabag sa tawhanong kinamatarong.
Suno kana, inde dapat pagbaliwalaon ro panawagan it komunidad bangud eamang sa ginapahayag nga ginakutaan raya it mga rebeldeng NPA.
Sa pihak kara, suportado it nasambit nga grupo ro panawagan sa insigidang pagpahilway sa Fil-Am community leader nga si Chantal Anicoche nga nasapwan it military nga nagapanago sa buho matapos ro combat operation it awtoridad.
Panawagan kara nga dapat pahilwayon si Anicoche kon uwa it kaso ag maid-id nga imbestigahan kon katapo gidman imaw it NPA ukon bukon para sa kaklaruhan it tanan.
