Mahigit PHP300 bilyon ang naibayad na benepisyo ng Philippine Health Insurance Corp. (PhilHealth) sa buong bansa noong 2025, batay sa tala ng mga tsekeng inilabas at payo ng pagbabayad mula Enero hanggang Disyembre. Umabot sa PHP300.45 bilyon ang kabuuang disbursement, kung saan PHP177.70 bilyon ang napunta sa mga pribadong pasilidad pangkalusugan at PHP122.75 bilyon sa mga ospital ng pamahalaan.
Ang kabuuang halaga ay mas mataas ng 81.72 porsiyento kumpara noong 2024, nang umabot sa PHP165.34 bilyon ang kabuuang bayad sa benepisyo. Noong panahong iyon, PHP74.02 bilyon ang naibigay sa mga pribadong pasilidad at PHP91.32 bilyon sa mga ospital ng gobyerno.
Ipinapakita ng pagtaas ng benepisyo ang mas pinalakas na suporta sa mga health facility at mas malawak na proteksiyong pinansyal para sa mga miyembro, kasabay ng patuloy na pagpapahusay ng access sa dekalidad na serbisyong pangkalusugan sa buong bansa.
