KALIBO, Aklan — Ginapahauman eon it pamunuan it grupong “Apo ni Inday” ro andang trip to Boracay matapos nga ideklarang grand slam champion sa bag-o eamang natapos nga Kalibo Sto. Niño Ati-Atihan Festival 2026 sa Traditional Ati Category nga nagbaton it cash prize nga P145,000.
Nasayuran nga sa sueod it tatlong magkasunod nga dag-on umpisa ko 2024 hasta makaron nga 2026 hay sanda ro kampeon sa nasambit nga kategorya.
Mag-eowas kara, makaron nga dag-on, naangkon man nanda ro mga special awards kapareho it Best in Ati-Atihan Costume, Best in Ati-Atihan Street Dancing, ag Best in Headdress .
Suno sa mag-asawang tribe owner nga sanday Melvin ag Minnie Centones it Brgy. Calangcang, Makato nga bilang pagpasaeamat sa andang kadaeag-an hay maga-outing sanda sa Boracay, eabi pa ag ginpahayag it pila sa andang mga miyembro nga maskin mga tumandok sanda it Aklan hay owa pa sanda nakatapak sa bantog nga Isla.
MMagaserbi man sigon raya nga family bonding bangud nga haeos tanan nanda nga miyembro hay andang kaigbataan.
Melvin Centones sa anang pagpahayag
Bangud sa pagiging grand slam champion sa nasambit nga kategorya, maabu sigon kanda ro naga-engganyo nga mag-level-up ukon magpasakop sa mas mataas nga kategorya, apang nagpamalibad ro mag-asawa ag nagpanindugan nga indi nanda paga-aywan ro Traditional Ati Category bangud nga dikara sanda nakilaea ag sumikat.
Mag-eowas kara, raya hay bilang pag-preserba man sa gin-umpisahan nga tradisyon it andang patriarch nga imaw ro nagtukod it grupo nga ro tuyo hay magpatigayon it sadsad panaad para sa debosyon ag panata kay Señor Santo Niño.
Unang nagpasakop ro grupo sa Ati-Atihan festival sa Makato ag Kalibo ko 2017 ukon haeos 19 anyos eon ro nagtaliwan.
Si Mrs. Minnie Centones sa anang pagpahayag
Sa pihak nga parte, gindeklara nga 1st runner up ro Salimono Tribe ag special award nga Best in beat and sounds ag 2nd runner up ro Tribu Naisud.
Ginsundan it Sinikway nga Ati, Tribu Datu Puti, Malipayong Ati ag Tribu Maninikop.
