KALIBO, Aklan — Ginasuhestiyon ni Sangguniang Bayan member Ronald Marte nga ipaidaeum sa maid-id nga training ag seminar ro mga traffic enforcement personnel it lokal nga gobyerno it Kalibo eabi eon ro mga bagito agud nga mas pa nga mapamayad ro andang obligasyon sa pagpatuman it mga batas-trapiko.
Suno kana nga pinaagi sa training hay masiguro nga mapatuman nanda it tama ro mga laye para sa kamaeayran it publiko.
Kinahangean suno kana nga maging pamilyar ro mga traffic enforcers sa mga regulasyon ag batas trapiko agud haum sa tanan nga oras eabi eon kon may ginatiketan nga mga violators.
Dapat suno kana nga knowledgeable ro mga raya sa kon ano nga specific nga laye ro iga-apply ag tama ro andang traffic apprehension methods sa mga karsadahon ag eabaw sa tanan hay kinahangean nga makaintigo nga magmandu it trapiko.
Naobserbahan sigon nanda nga kaeabanan nga ginasalang eagi sa trabaho ro mga bag-ong hired nga traffic enforcers maskin nga owa pa it nagakaigo nga training ag seminar.
