KALIBO, Aklan — Ginklaro it Philippine Statistics Authority (PSA) Aklan nga uwa nagatawag ro ahensya sa mga kliyente agud nga i-update ro andang datos.
Raya hay kasunod it reklamo it sangka babaye nga nabiktima it online scam kon sa siin naboe-an imaw it mabahoe nga kantidad.
Suno kay Rodelyn Panadero, Supervising Statistical Specialist it PSA Aklan, uwa sanda it kahilabtanan sa nagpakilaea nga tawuhan sigon it PSA nga nagtawag sa biktima may kaangtanan sa national ID it anang asawa.
Dugang pa ni Panadero, kon gusto mag-update it datos ro sangka kliyente, mismong gina-entertain nanda raya personally ag sanda mismo ro nagaasikaso it mga dokumento ag uwa it tawuhan it PSA nga nagatawag sa maskin sin-o nga indibidwal may kaangtanan sa private information mag-eowas eon lang kon sanda mag-adto personally sa taeatapan para i-update ro andang information.
Sa makaron suno kay Panadero, may nagapang baeay-baeay gidman nga 49 nga data collectors nga nagadumaea sa 96 enumeration areas ag 79 nga barangay sa probinsya sa idaeom it limang team supervisors agud nga kumpletuhon ro sangka datos sa kita ag gaeastuson it pamilya, bilang ikaywang bahin it Family Income and Expenditure Survey (FIES) nga unang ginpatigayon ko Hulyo 2025.
Tuyo kara nga masukat ro distribusyon it kita, lebel it bukon it pagkapaeareho, ag magserbing basehan sa paghuyap it Consumer Price Index (CPI), poverty thresholds, poverty incidence, ag Human Development Index (HDI) sa nagkaeain-eain nga lebel it gobyerno.
Apang, uwa it gatawag maghalin sa andang taeatapan para magbuoe it andang datos.
